Høyring: Enklare tilgang til helseopplysningar for kvalitetssikring av helsehjelp og eiga læring
Helse- og omsorgsdepartementet ønskjer at helsepersonell skal få enklare tilgang til helseopplysningar om tidlegare pasientar for kvalitetssikring eller eiga læring. Me har gått gjennom forslaga til endring i helsepersonellova § 29 c og sendt inn høyringssvar.
Nasjonalt klageorgan for helsetenesta behandlar klager på vedtak frå fleire instansar. Vår erfaring er at deling av informasjon og enklare tilgang til helseopplysningar kan vera nyttig for å betra kvaliteten av tenestene og auka tilliten til helsevesenet og forvaltninga.
Her kan du lesa vårt høyringssvar til lovendringa (pdf).
Bakgrunnen for høyringa
Helse- og omsorgsdepartementet foreslår å forenkla helsepersonell sin adgang til opplysningar for kvalitetssikring av helsehjelp eller for eiga læring. Dette vil typisk vera når helsepersonell ønskjer å få avklart om vurderingane og tiltaka som blei gjort var riktige. Det er eit gode for pasientane at helsepersonell stadig lærer og kvalitetssikrar vurderingane sine.
Teiepliktige opplysningar kan i dag etter særskilt anmodning gjerast tilgjengelege for helsepersonell som tidlegare har ytt helsehjelp til pasienten i eit konkret behandlingsforløp, for kvalitetssikring av helsehjelpa eller eiga læring, sjå helsepersonellova § 29 c.
Departementet foreslår å fjerna kravet til at helsepersonell må be om å få desse opplysningane. Dei kan dermed søkja opp helseopplysningar i tidlegare pasientar sin journal. Det vil framleis vera krav til oversikt (logg) over kven som har henta opplysningar frå journalar og at oversikta kan gjerast tilgjengeleg for pasienten.