Behandlingsreise til utlandet

Oslo universitetssjukehus organiserer diagnosespesifikke behandlingstilbod i eit varmt og solrikt klima til personar med definerte kroniske sjukdommar. Behandlingsreise er eit supplement til behandling gitt i Noreg, men er ingen rett.

Klagesakene gjeld avslag på søknad om behandlingsreise til utlandet.

Skal du klage på eit vedtak?

Saksbehandlinga hos oss

Vi får tilsendt klagesaka frå Oslo universitetssjukehus. Når vi har fått saka di, sender vi deg eit brev om at ho er registrert hos oss. I brevet får du òg informasjon om forventa saksbehandlingstid. Saksbehandlingstida varierer etter kompleksiteten i saka. 

Saksbehandlinga er skriftleg. Saksbehandlaren som blir tildelt saka di, gjer ei ny juridisk vurdering og hentar inn nye eller oppdaterte opplysningar viss det er nødvendig. Vedkommande vurderer om det er grunnlag for å endre vedtaket frå førsteinstansen. Det er alltid minst to personar som vurderer saka.

Når vi har gjort eit vedtak i saka, sender vi det til deg eller representanten din. Vi sender òg vedtaket til Oslo universitetssjukehus. Det er sjukehuset som følgjer opp vedtaket dersom du får medhald.

Du kan følgje klagesaka di på Mi side.

Vedtaka våre er endelege

Vedtak frå oss er endelege. Det betyr at du ikkje kan klage på dei. Vedtak kan leggjast fram for domstolane for rettsleg overprøving.